Ahmad Ali Barqi Azmi
nazar bacha ke vo ham se guzar gae chup-chap
abhi yahin the na jaane kidhar gae chup-chap
hui khabar bhi na ham ko kab aae aur gae
nigah-e-naz se dil men utar gae chup-chap
dikhai ek jhalak aur ho gae ru-posh
tamam khvab achanak bikhar gae chup-chap
ye dekhne ke liye muntazir hain kya vo bhi
dayar-e-shauq men ham bhi thahar gae chup-chap
karenge aisa vo is ka na tha hamen ehsas
vo qaul-o-feal se apne mukar gae chup-chap
fasil-e-shahr ke bahar nahin kisi ko khabar
bahut se ahl-e-hunar yunhi mar gae chup-chap
dikha rahe the hamen sabz baagh vo ab tak
unhen jo karna tha ‘barqi’ vo kar gae chup-chap
Leave a Reply