Muztar Khairabadi
fasl-e-gul bhi taras ke kaaTi hai
umr kanTon men bas ke kaaTi hai
main ne ro kar guzar di ai abr
jaise tu ne baras ke kaaTi hai
ho ke paband-e-ulfat-e-sayyad
zindagi be-qafas ke kaaTi hai
soz-e-ulfat men zindagi main ne
ghair ka munh jhulas ke kaaTi hai
zindagi-bhar rahe hasinon men
umr phulon men bas ke kaaTi hai
us ne kis naaz se miri gardan
kamar-e-shauq kas ke kaaTi hai
us ki hasrat hai diid ke qabil
jis ne ‘muztar’ taras ke kaaTi hai
Leave a Reply