jaane kitna jivan pichhe chhuT gaya anjane men
ab to kuchh qatre hain baaqi sanson ke paimane men
apni pyaas liye honTon par lauT aa.e maiḳhane men
kitne tishna-lab baiThe the pahle hi maiḳhane men
kya kya ruup liye rishton ne kaise kaise rang bhare
ab to farq nahin kuchh lagta apne aur begane men
jazbon ki mismar imarat yadon ke be-jan khanDar
jaane kyuun baiThe hain tanha ham aise virane men
is basti men aa kar ham ne kuchh aisa dastur suna
aql ki baten karne vaale honge pagal-ḳhane men
itna jaan liya to yaaro kaisi bandish unvan ki
apna apna rang bharega har koi afsane men
takmil-o-taḳhliq ka lamha bhari hai in sadiyon par
jo abad nagar ki qismat likh Dalin virane men
Leave a Reply