maane to kis ki divana maane
jitni zabanen utne fasane
andaz us ka ahval mera
kuchh main na samjhun kuchh vo na jaane
allah re ye ḳhud-e’timadi
main ab chala huun un ko bulane
gum-karda-e-rah kya sochta hai
chhoḌ aaya pichhe kitne Thikane
meri vafa ka vo mo’tarif hai
apni ḳhata ko maane na maane
chaho to aao chaho na aao
donon ke yaksan hiile bahane
kuchh mere gham se nisbat hai un ko
yaad aa rahe hain kitne fasane
kya hai ‘salim’ in baton ka hasil
kis ko chala hai tu azmane
Leave a Reply