Shaad Aarfi
taare jo asman se gire ḳhaak ho ga.e
zarre uThe to barq-e-ghazab-nak ho ga.e
pursan-e-hal dida-e-namnak ho ga.e
ye kab se aap sahib-e-idrak ho ga.e
anjam-e-imbisat-e-chaman ke saval par
itna hanse ki phuul jigar-chak ho ga.e
hona paḌega qa.el-e-tamir-e-ahd-e-nau
jis din gharib darḳhur-e-imlak ho ga.e
taftish-e-hal-e-mausam-e-gul ko chale hain aap
ab jab ki ashiyan ḳhas-o-ḳhashak ho ga.e
saada dilon ne rahnumayan-e-qaum se
itne fareb khaa.e ki chalak ho ga.e
dah zehn vo dimagh jo aa.e vatan ke kaam
nazr-e-nashat-e-bada-o-tiryak ho ga.e
chhuTa na ham se daman-e-tahzib-e-anjuman
dushman zara si Dhiil pe be-bak ho ga.e
taslim kar na paa.e jinhen ḳhaksar ham
vo aap ki bala se agar ḳhaak ho ga.e
sar par chaḌha liya hai jinhen aaj aap ne
kal dekh lenge aap ḳhatarnak ho ga.e
ham bhi imam-e-masjid-e-jama ki tarah ‘shad’
dho.e ga.e kuchh aise ki bas paak ho ga.e
Leave a Reply