Manmohan Talkh
mujh ko ye kya ho jaata hai ghar ka tasavvur aate hi
jaise ghar suuna suuna lagta hai kisi ke jaate hi
apne jo qisse auron se sun sun kar ḳhush hote the
ham the apni nazar men jhuTe ḳhud un ke dohrate hi
vo jo bahut bharpur the ḳhud men vo kyuun saath men chiḳh uThe
ham to ḳhud se ḳhaufzada the ham to shor machate hi
saath tira hasil na raha kab ham ko yaad nahin paḌta
ya.ani rishta koi baaqi hai milne aa us naate hi
dhyan kise tha tere ji men aa.i hai dard baTane ki
varna saath tire kahne par ham kuchh duur to jaate hi
aaj jo tujh se baat hui to jaise ham vo hain hi nahin
itna arsa biit gaya kya tujh tak aate aate hi
tu ne kaha bhi ho jo kabhi kuchh tujh ko kya ma.alum ki main
kitna ḳhali ho jaata huun tujh ko dhyan men laate hi
shayad koi ek hi aaya shayad koi na aaya tha
ham na jo tum ko dekh sake the tum ko nazar to aate hi
bahar andar talḳh andhera kis ko DhunDne nikle ho
jot jala aate chaukhaT par kuchh to Dharas paate hi
Leave a Reply