Duniya Se Alag Humne Maikhane Ka Dar Dekha

duniya se alag ham ne maikhane ka dar dekha

maikhane ka dar dekha allah ka ghar dekha

goshe se nasheman ke aahon ka asar dekha

sayyad ka ghar jalte be-barq-o-sharar dekha

donon ke maze luute donon ka asar dekha

allah ka ghar dekha maikhane ka dar dekha

yuun hashr men sairen kiin firdaus-o-jahannam ki

kuchh der udhar dekha kuchh der udhar dekha

ai shaikh vo kaaba ho ya ho dar-e-mai-khana

tu ne mujhe jab dekha sajde hi men sar dekha

naala hamen karna tha dam ishq ka bharna tha

sau rang se marna tha har rang se mar dekha

jab mauj ubharti hai kahti hai vo shokhi se

baazu men bat-e-mai ke surkhab ka par dekha

tanke diye jaate hain kyuun lab siye jaate hain

hansne ka maza tu ne ai zakhm-e-jigar dekha

nisbat nahin mujh ko kuchh bekas ke bujhe dil se

bujhte hue tujh ko bhi aae sham-e-sahar dekha

sahme hue baithe hain khoe hue baithe hain

jis raat ke arman the us raat ko Dar dekha

phal phuul nahin laate ye bagh-e-mohabbat men

har nakhl-e-tamanna ko be-barg-o-samar dekha

kaabe men nazar aae jo subh azaan dete

maikhane men raton ko un ka bhi guzar dekha

kuchh kaam nahin mai se go ishq hai us shai se

main rind ‘riyaz’ aise daman bhi na tar dekha

Leave a Comment