ḳhuun kis kis ka hua sadqe tiri talvar par
fasl-e-gul dhabbe hain lakhon daman-e-gulzar par
ab raha dil ta-qayamat abru-e-ḳham-dar par
kya haTega vo jo gardan rakh chuka talvar par
fasl-e-gul ruḳhsat hui ro lijiye gulzar par
bas yahi do-tin pankhuḌiyan hain ya do-char par
vasl-e-furqat ki shaben donon men niind aati nahin
hans raha huun ro raha huun tala-e-bedar par
intiha par ishq aa kar ho gaya hai ain husn
maut ki bhi aankh paḌti hai tire bimar par
vasl se mayus ho kar kaam mera ban gaya
saikḌon iqrar sadqe ho ga.e inkar par
main nahin lakhon paḌe hain muḌ ke pichhe dekhiye
naqsh-e-pa ghash kha ga.e hain shoḳhi-e-raftar par
daagh valon ke nasheman shab ko bhi chhupte nahin
dhuup si phaili hui hai baagh ki divar par
gardanen vo ḳham kiye hain jin ke sar hain bar-e-ḳhun
tu agar ḳhud-bin nahin Daal ik nazar talvar par
ashk-rezan-e-chaman se ḳhanda-e-gul dab gaya
os paḌti hai na.i har shab sar-e-gulzar par
ek ik rag de rahi hai lau vufur-e-soz se
naaz hai ‘saqib’ ko apne ḳhil.at-e-zar-tar par
Leave a Reply