Ameer Imam
har ah-e-sard ishq hai har vaah ishq hai
hoti hai jo bhi jur.at-e-nigah ishq hai
darban ban ke sar ko jhuka.e khaḌi hai aql
darbar-e-dil ki jis ka shahanshah ishq hai
sun ai ghurur-e-husn tira tazkira hai kya
asrar-e-ka.enat se agah ishq hai
jabbar bhi rahim bhi qahhar bhi vahi
saare usi ke naam hain allah ishq hai
mehnat ka phal hai sadqa-o-ḳhairat kyuun kahen
jiine ki ham jo paate hain tanḳhvah ishq hai
chehre faqat paḌav hain manzil nahin tiri
ai karvan-e-ishq tiri raah ishq hai
aise hain ham to koi hamari ḳhata nahin
lillah ishq hai hamen vallah ishq hai
hon vo ‘amir-imam’ ki farhad-o-qais hon
aao ki har shahid ki dargah ishq hai
Leave a Reply