vo ishq jo ham ko lahiq tha
shab-ha-e-siyah ke daman men
asrar junun ke khol gaya
bahr-e-maujud ke markaz se
ik mauj-e-talatum-khez utthi
ik dard ki lahar uthi dil ke rauzan se
jis men simat gae
donon aalam ke ranj o tarab
aur hast-o-bud ke mahvar par
ranj o rahat ham-raqs hue
furqat ke tanha lamhon men
abad thi ik duniya-e-fusun
raftar-e-gham ki mauj-e-ravan
avara bagule yadon ke
barish ki maddham bundon ke
sargam ki faravan mausiqi
ashjar ki raqsan shakhon se
chhanta hua fitrat ka jaadu
duniya-e-nashat-o-dard ki lai
andoh o alam ka ik aalam
takhliq ke larzan siine ke asrar-e-nihan
naghma-bar-lab ye arz o sama
nauha dard-e-dil batin ki faza
takhliq jahan ke sar nihan
patte patte ki rangat men
harf kin ka jaadu larzan
sab ik vahdat men jazb hue
ik vajd agin ehsas men
ruuh o jism o jaan malbus hue
vaqt aur makan ke sirr-e-nihan malbus hue
is ishq se ye asrar khula
ham zinda hain aur rah-e-fana men jaulan hain
ik roz ye dil bujh jaega
bas nur-e-khuda rah jaega
vo ishq jo ham ko lahiq tha
asrar-e-vajud o ramz-e-adam sab khol gaya