Kabhi Kisi Ko Na Ahd-E-Wafa Ka Pas Hua

kabhī kisī ko na ahd-e-vafā kā paas huā

sahar kā ḳhvāb añdheroñ se rū-shanās huā

vo ek lafz jo mahdūd-e-ḳhalvat-kun thā

vo lafz phailā to mansūr-e-ḳhud-shanās huā

hamāre ba.ad bhī lākhoñ the Dūbne vaale

ab is ko kyā kareñ dariyā hī nā-sipās huā

karam kisī kā had-e-e’tidāl se baḌh kar

hamāre jazba-e-ḳhud-dār kī asaas huā

talab meñ ham-safarī kī lagan kahāñ phir bhī

pukār leñge agar koī aas paas huā

udhar thā lafz-e-vafā jaise hukm-e-shāhāna

mirī zabān pe aayā to iltimās huā

tavaqquāt ke jaadū kā zor to TuuTā

shikast aaj tilism-e-umīd-o-yās huā

marāhil-e-ġham-e-hastī kī uljhaneñ tauba

kahīñ vafā kā kahīñ zindagī kā paas huā

vo ḳhāmushī thī jo tahsīn-e-nā-shanās huī

vo shor thā jo sukūt-e-suḳhan-shanās huā

Leave a Comment