Poet
kabhi kisi ko na ahd-e-vafa ka paas hua
sahar ka ḳhvab andheron se ru-shanas hua
vo ek lafz jo mahdud-e-ḳhalvat-kun tha
vo lafz phaila to mansur-e-ḳhud-shanas hua
hamare ba.ad bhi lakhon the Dubne vaale
ab is ko kya karen dariya hi na-sipas hua
karam kisi ka had-e-e’tidal se baḌh kar
hamare jazba-e-ḳhud-dar ki asaas hua
talab men ham-safari ki lagan kahan phir bhi
pukar lenge agar koi aas paas hua
udhar tha lafz-e-vafa jaise hukm-e-shahana
miri zaban pe aaya to iltimas hua
tavaqquat ke jaadu ka zor to TuuTa
shikast aaj tilism-e-umid-o-yas hua
marahil-e-gham-e-hasti ki uljhanen tauba
kahin vafa ka kahin zindagi ka paas hua
vo ḳhamushi thi jo tahsin-e-na-shanas hui
vo shor tha jo sukut-e-suḳhan-shanas hua
Leave a Reply