Jawad Sheikh
ye vahm jaane mere dil se kyuun nikal nahin raha
ki us ka bhi miri tarah se ji sambhal nahin raha
koi varaq dikha jo ashk-e-ḳhun se tar-ba-tar na ho
koi ghazal dikha jahan vo daagh jal nahin raha
main ek hijr-e-be-murad jhelta huun raat din
jo aise sabr ki tarah hai jis ka phal nahin raha
to ab mire tamam ranj mustaqil rahenge kyaa?
to kya tumhari ḳhamushi ka koi hal nahin raha?
kaḌi masafaton ne kis ke paanv shal nahin kiye?
koi dikhao jo bichhaḌ ke haath mal nahin raha
Leave a Reply