”patthar ki zaban” ki shaera ne
ik mahfil-e-sher-o-shaeri men
jab nazm sunate mujh ko dekha
kuchh soch ke dil men muskurai
jab mez par ham mile to us ne
badh kar mire haath aise thame
jaise mujhe khojti ho kab se
phir mujh se kaha ki aaj, ‘parvin’!
jab sher sunate tum ko dekha
main khud ko bahut hi yaad aai
vo vaqt ki jab tumhari surat
main bhi yunhi sher kah rahi thi
likhti thi isi tarah ki nazmen
par ab to vo saari nazmen ghazlen
guzre hue khvab ki hain baten!
main sab ko disown kar chuki huun!
”patthar ki zaban” ki shaera ke
chambeli se narm haath thame
”khushbu” ki safir sochti thi
dar-pesh havaon ke safar men
pal pal ki rafiq-e-rah mere
andar ki ye sada-lauh ‘Alice’
hairat ki jamil vadiyon se
vahshat ke muhib jangalon men
aaegi to us ka phul-lahja
kya jab bhi saba-nafas rahega!?
vo khud ko disown kar sakegi!?