Wali Alam Shaheen
badan ke ruup ka ejaaz ang ang thi vo
mire liye to miri ruuh ki tarang thi vo
gulon ke naam khuli piiTh par miri likh kar
ḳhizan ke phailte lamhon se mahv-e-jang thi vo
siyah ghaTaon se kirnen tarash leti thi
miri hayat ki ik jagti umang thi vo
vo zaḳhm-ḳhurda-e-halat ḳhud rahi lekin
tamam nik.hat o naghma tamam rang thi vo
na jaane kitne the ‘shahin’ us ke matvale
agarche shaḳh men uljhi hui patang thi vo
Leave a Reply