Shamim Jaipuri
aaj meri shab-e-furqat ki sahar aa.i hai
muddaton ba.ad tiri rahguzar aa.i hai
dekh to liije mire ḳhun-e-tamanna ki bahar
jis ki surḳhi miri a.ankhon men utar aa.i hai
tu ne to tark-e-mohabbat ki qasam khaa.i thi
kyuun tiri aankh mujhe dekh ke bhar aa.i hai
un ke pairahan-e-rangin ki mahak hai is men
aaj kya bad-e-saba ho ke udhar aa.i hai
is men kuchh un ki jafa.en bhi to shamil hain ‘shamim’
bevafa.i ki jo tohmat mire sar aa.i hai
Leave a Reply