adeem-hashmi

Rakht-e-Safar Yunhi To Na Bekar Le Chalo

rakht-e-safar yunhi to na bekar le chalo

rasta hai dhuup ka koi divar le chalo

taqat nahin zaban men to likh hi lo dil ki baat

koi to saath surat-e-iz.har le chalo

dekhun to vo badal ke bhala kaisa ho gaya

mujh ko bhi us ke samne is baar le chalo

kab tak nadi ki tah men utaroge kashtiyan

ab ke to haath men koi patvar le chalo

padti hain dil pe gham ki agar silvaten to kya

chehre pe to khushi ke kuchh asar le chalo

jitne bhanvar kahoge pahan lunga jism par

ik baar to nadi ke mujhe paar le chalo

kuchh bhi nahin agar to hatheli pe jaan sahi

tohfa koi to us ke liye yaar le chalo

More Poems

Leave a Comment