harim-e-jabr men ḳhamosh bhi raha na gaya
safir-e-shab ko naqib-e-sahar kaha na gaya
ajiib kaifiyat-e-karb hai fazaon men
gulon ne barha chaha magar hansa na gaya
shab-e-sitam ka bayan jurm hi sahi kiije
guman na ho ki sar-e-bazm kuchh kaha na gaya
ḳhayal-e-ḳhatir-e-saqi ki ḳhair rindon men
kahin bhi tazkira-e-tishnagi suna na gaya
dayar-e-ishq hai goya dayar-e-karb-o-bala
yahan se uTh ke koi dard-ashna na gaya
ajab tarah ke musafir the ham ki baiTh rahe
bhaTak ke raah se do gaam bhi chala na gaya
hazar marhala-e-jabr se hue do-char
dil-e-‘shamim’ se jiine ka hausla na gaya
Leave a Reply