kabhi raste ko rote hain kabhi mushkil ko rote hain
jo nakame safar hote hain vo manzil ko rote hain
zara andaz to dekhe koi in dil-figaron ka
palaTte hain varaq maazi ka mustaqbil ko rote hain
ḳhudaya kis qadar nadan hain ye kashtiyan vaale
samundar par nazar rakhte hain aur sahil ko rote hain
badal diin inqilab-e-vaqt ne qadren zamane ki
sajate the jo ḳhud mahfil vo ab mahfil ko rote hain
guzarti hai isi aalam men ‘rahbar’ zindagi apni
kabhi dil ham ko rota hai kabhi ham dil ko rote hain
Leave a Reply