Shakeel Gwaliari
zinda vo apne saath ke bimar bhi nahin
marte raho ki ab koi gham-ḳhvar bhi nahin
aksar ḳhayal-e-zulf se TuuTa sukut-e-shab
zanjir ab nahin hai to jhankar bhi nahin
hamsa.egi pe us ki bahut naaz hai hamen
divar se lagi hui divar bhi nahin
daman ka chaak chak-e-gareban se ja mile
ab ashiqi ka ye koi meyar bhi nahin
ankhon men aa gaya hai lahu ho ke apna dil
us ki taraf se vada-e-didar bhi nahin
us ke kahe se de mujhe dozaḳh hi ai ḳhuda
a.amal se to aisa gunahgar bhi nahin
Leave a Reply