kisi ki aankh ḳhali ho gai thi
mohabbat itni mahngi ho gai thi
tujhe jaate samay itna pukara
miri avaz zaḳhmi ho gai thi
zara sa muskura ke us ne dekha
faza saari gulabi ho gai thi
vo jis din rasta badla tha tu ne
miri har raah khoti ho gai thi
use raaja nahin mil paaya to phir
vo ḳhud hi apni raani ho gai thi
hamare haath niche gir gae the
tiri divar unchi ho gai thi
adhure ḳhvab se pichha chhudaya
mujhe ab niind pyari ho gai thi
use janma tha main ne dukh utha ke
parai kaise beti ho gai thi
tumhari raah takte thak gai jab
vo kaali aankh niili ho gai thi