parda ruḳh-e-fitrat se haTa kar nahin dekha
manzar pe nazar thi pas-e-manzar nahin dekha
ansar ke ḳhanjar pe muhajir ka lahu hai
tariḳh ne aisa kabhi manzar nahin dekha
patthar ki siyasat se jo mahfuz raha ho
aisa kisi shishe ka muqaddar nahin dekha
thi dastaras-e-fikr men vo sa.at-e-ḳhush-rang
ḳhushbu ka badan tha use chhu kar nahin dekha
vo shahr ke hangamon men ḳhamosh khaḌi hai
shayad shab-e-hijran ne mira ghar nahin dekha
tarshe to sanam pighle to shishe ki nazakat
ai kam-nazro tum ne vo patthar nahin dekha
jhukne nahin deti hai ana tishna-labi ko
dariya ki taraf main ne palaT kar nahin dekha
hai us ko bahut quvvat-e-bazu pe bharosa
dariya ke shanavar ne samundar nahin dekha
hai gham hi se labrez to phir kaisi masarrat
kya tu ne mira zarf-e-muqaddar nahin dekha
Leave a Reply