Tahir Adeem
chandni ka hai badan ya hai badan men chandni
jab utarta hai utarti hai chaman men chandni
tirgi jab paanv phaila.e to phir sunna use
bandh kar rakhta hai vo apne suḳhan men chandni
jab bhi likhta huun qalam se phuTti hai raushni
ghol di hai kis ne dasht-e-fikr-o-fan men chandni
yaar ki shahr-e-butan men ik nishani ye bhi hai
chand sa chehra hai us ka aur man men chandni
raushni ke isti.are hain kahani men sabhi
naam us ka hai kahani ke matan men chandni
vo sanvarta ja raha hai samne ‘tahir-adim’
aur barasti ja rahi hai dil ke ban men chandni
Leave a Reply