Chandni Ka Hai Badan Ya Hai Badan Mein Chandni

chāñdnī kā hai badan yā hai badan meñ chāñdnī

jab utartā hai utartī hai chaman meñ chāñdnī

tīrgī jab paañv phailā.e to phir sunñā use

bāñdh kar rakhtā hai vo apne suḳhan meñ chāñdnī

jab bhī likhtā huuñ qalam se phūTtī hai raushnī

ghol dī hai kis ne dasht-e-fikr-o-fan meñ chāñdnī

yaar kī shahr-e-butāñ meñ ik nishānī ye bhī hai

chāñd sā chehra hai us kā aur man meñ chāñdnī

raushnī ke isti.āre haiñ kahānī meñ sabhī

naam us kā hai kahānī ke matan meñ chāñdnī

vo sañvartā jā rahā hai sāmne ‘tāhir-adīm’

aur barastī jā rahī hai dil ke ban meñ chāñdnī

Leave a Comment