kabhi sham-e-hijr guzarte kabhi zulf-e-yar sanvarte
kaTi umr apni qafas qafas tiri ḳhushbuon ko pukarte
na vo mah-jabinon ki Toliyan na vo rang rang ki boliyan
na mohabbaton ki vo baziyan kabhi jit.te kabhi harte
vo jo arzuon ke ḳhvab the vo ḳhayal the vo sarab the
sar-e-dasht ek bhi gul na tha jise ansuon se sanvarte
tha jo ek lamha visal ka vo riyaz tha ka.i saal ka
vahi ek pal men guzar gaya jise umr guzri pukarte
the jo jaan se bhi aziz-tar rahe umr bhar vahi be-ḳhabar
thi ye aarzu mire chara-gar miri naav paar utarte
nahin lab pe koi saval tha mira dil tamam malal tha
main ḳhamosh dar pe khaḌa raha rahe vo bhi gesu sanvarte
Leave a Reply