ye furqaton men lamha-e-visal kaise aa gaya
mohabbaton men phir naya ubaal kaise aa gaya
jise jahan ke mashghalon men apna hosh bhi na tha
achanak aaj use mira ḳhayal kaise aa gaya
abhi talak to mere saare zaḳhm the hare-bhare
yakayak un ko kar-e-indimal kaise aa gaya
juda.i ka bas ek pal giran tha zindagi pe jab
to darmiyan bahr-e-mah-o-sal kaise aa gaya
abhi talak thiin vaqt ki tanaben us ke haath men
adam faraghaton ka phir saval kaise aa gaya
mire zara se dard par taḌap thi jis ki didani
use sitamgari ka ye kamal kaise aa gaya
‘nadim’ apni chahaton pe naaz tha tumhen bahut
to phir tumhare ishq par zaval kaise aa gaya
Leave a Reply