Javed Akhtar
bahana DhunDte rahte hain koi rone ka
hamen ye shauq hai kya astin bhigone ka
agar palak pe hai moti to ye nahin kaafi
hunar bhi chahiye alfaz men pirone ka
jo fasl ḳhvab ki tayyar hai to ye jaano
ki vaqt aa gaya phir dard koi bone ka
ye zindagi bhi ajab karobar hai ki mujhe
ḳhushi hai paane ki koi na ranj khone ka
hai paash paash magar phir bhi muskurata hai
vo chehra jaise ho TuuTe hue khilaune ka
Leave a Reply