Meer Taqi Meer
bar-ha gor-e-dil jhanka laaya
ab ke shart-e-vafa baja laaya
qadr rakhti na thi mata-e-dil
saare aalam men main dikha laaya
dil ki yak qatra khuun nahin hai besh
ek aalam ke sar bala laaya
sab pe jis baar ne girani ki
us ko ye na-tavan utha laaya
dil mujhe us gali men le ja kar
aur bhi khaak men mila laaya
ibtida hi men mar gae sab yaar
ishq ki kaun intiha laaya
ab to jaate hain but-kade se ‘mir’
phir milenge agar khuda laaya
Leave a Reply