Jaane Hum Ye Kin Galiyon Mein KHak uDa Kar Aa Jate Hain

Zulfiqar Aadil

jaane ham ye kin galiyon men ḳhaak uḌa kar aa jaate hain

ishq to vo hai jis men na-maujud mayassar aa jaate hain

jaane kya baten karti hain din bhar aapas men divaren

darvaze par qufl laga kar ham to daftar aa jaate hain

kaam mukammal karne se bhi shaam mukammal kab hoti hai

ek parinda rah jaata hai baaqi sab ghar aa jaate hain

apne dil men gend chhupa kar un men shamil ho jaata huun

DhunDte DhunDte saare bachche mere andar aa jaate hain

miim mohabbat paḌhte paḌhte likhte likhte kaaf kahani

baiThe baiThe is maktab men ḳhaak barabar aa jaate hain

roz nikal jaate hain ḳhali ghar se ḳhali dil ko le kar

aur apni ḳhali turbat par phuul saja kar aa jaate hain

ḳhaak men ungli pherte rahna naqsh banana vahshat likhna

in vaqton ke chand nishan ab bhi kuzon par aa jaate hain

naam kisi ka raTte raTte ek girah si paḌ jaati hai

jin ka koi naam nahin vo log zaban par aa jaate hain

phir bistar se uThne ki bhi mohlat kab milti hai ‘adil’

niind men aati hain avazen ḳhvab men lashkar aa jaate hain