aisha-ayyub

Kisi Ke Hijr Ko Aise Mana Rahe The Hum

kisi ke hijr ko aise mana rahe the ham

ghaḌi men vaqt ko ulTa ghuma rahe the ham

nahin tha yaad sabaq apni zindagi ka hamen

so imtihan ka parcha bana rahe the ham

kinare baiTh ke aansu baha ke aae the

nadi ki pyaas ko paani pila rahe the ham

kiya ye jurm ki apne hi dil ki sunte the

yahi kahen ki ḳhud apni saza rahe the ham

ham us ke zulm ke baḌhne ke intizar men the

tabhi to zabt ki quvvat baḌha rahe the ham

laga ke ek Thahaka usi ke zer-e-asar

bas apne zaḳhm ko nicha dikha rahe the ham

ḳhud apne aap ko shanon pe le ke chalte the

ḳhud apne aap ka matam mana rahe the ham

More Poems

Leave a Comment