Masoom Ansari
rishton ke darmiyan saf-ara.i ho ga.i
na-ashnaon se bhi shanasa.i ho ga.i
kya karte zindagi se mohabbat hamen bhi thi
nilam chand sikkon men sachcha.i ho ga.i
jis ko ho e’tiraz vo nazren sameT le
is daur men bura.i bhi achchha.i ho ga.i
lagta hai ghul ga.i hai siyasat ḳhulus men
apne hi doston se harifa.i ho ga.i
saare subut chhoḌ ke sar kaaT le ga.e
nadan qatilon se ye dana.i ho ga.i
‘ma.asum’ mera sher tha ya mauj-e-be-qarar
ghar baiThe saare shahr men rusva.i ho ga.i
Leave a Reply