Khursheed Rizvi
tu hai ki chistan ki ibarat hai tah-ba-tah
dil hai ki sang-basta-e-hairat hai tah-ba-tah
jo aankh dekhne men ḳharaba dikha.i de
samjho ki is men koi amanat hai tah-ba-tah
bahr-e-ana huun meri tahon men utar ke dekh
ḳhvabida mujh men vaqt ki mayyat hai tah-ba-tah
vo chashm-e-surma-sa ki jise be-zaban kahen
us ki ḳhamoshiyon men isharat hai tah-ba-tah
fursat kahan ki ghair se ham dushmani karen
apna vajud ek musibat hai tah-ba-tah
shayad koi gaya ho zamane se kamgar
apni to ziist kan-e-nadamat hai tah-ba-tah
Leave a Reply