aata chala gaya hai vo ḳhush-fikr dhyan men
baḌhti chali ga.i hai nafasat bayan men
yuun kho gaya huun masnavi sahar-ul-bayan men
shamil huun jaise main bhi usi dastan men
ik pair chhu gaya hai kisi mah-jamal ka
ab jashn ka saman sa hai kapḌe ke thaan men
tujh tak to main pahunch hi gaya huun magar ye kya
dil sarf ho chuka hai kahin darmiyan men
ham bhi lavahiqin hain marhum ishq ke
likhiye hamara naam bhi azurdagan men
us naqsh ka numud se kya vasta bhala
aaya nahin jo us nigah-e-mehrban men
ankhon men tairte hue Doron ki ḳhair ho
mausam ne kuchh kaha to nahin tere kaan men
Leave a Reply