Abbas Rizvi
jis ko ham samajhte the umr bhar ka rishta hai
ab vo rabta jaise rahguzar ka rishta hai
sub.h tak ye maujen bhi thak ke so hi jaengi
chand ka samundar hai raat bhar ka rishta hai
ye jo itne saare dil saath hi dhadakte hain
kuchh qalam ka naata hai kuchh hunar ka rishta hai
tez hain to kya gham hai tund hain to shikva kya
in havaon se apna bal-o-par ka rishta hai
is hasin tasavvur ka meri surkh ankhon se
aab o gil ka naata hai bam-o-dar ka rishta hai
ek na-tavan rishta us se ab bhi baaqi hai
jis tarah duaon ka aur asar ka rishta hai
Leave a Reply