bahar ka ruup bhi nigahon men ik fareb-e-bahar sa hai
hayat men dilkashi nahin hai hayat men intishar sa hai
zamana kya dekhiye dikha.e na jaane kya inqalab aa.e
falak ke tevar men ḳhashmagin se zamin ke dil men ghubar sa hai
kamal-e-divangi to jab hai rahe na ehsas-e-jaib-o-daman
agar hai ehsas-e-jaib-o-daman to phir junun hoshiyar sa hai
kuchh aaj aisi hi ji pe guzri dabi hui thi jo choT ubhri
jise sambhale hua tha dil men vo naala be-iḳhtiyar sa hai
abhi umid-o-vafa na toḌo siyasat-e-dilbari na chhoḌo
kabhi jo firdaus-e-rang-o-bu tha vo ek ujḌa dayar sa hai
‘nihal’ ko be piye hai masti hai muft ilzam-e-mai-parasti
hai aam is shahr men rivayat ye shaḳhs kuchh bada-ḳhvar sa hai
Leave a Reply