Zameer Kazmi
hamara ho ke bhi kab apne bas men rahta hai
ye dil hamesha tiri dastaras men rahta hai
use sharabi na samjho ki sub.h hote hi
vo mandiron ke sunahre kalas men rahta hai
hai e’tibar se be-e’tibar sarhad tak
vo fasla jo mire ham-nafas men rahta hai
tamanna ye hai ki kuchh lamhe dil ke naam karen
magar dimagh ki hirs-o-havas men rahta hai
ham apne ghar men bhi kuchh is tarah se rahte hain
ki jaise koi parinda qafas men rahta hai
talash karti hai duniya jise ba-nam-e-‘zamir’
vo naghma ban ke sada-e-jaras men rahta hai
Leave a Reply