apne ehsas-e-sharar-bar se dar lagta hai
apni hi jurat-e-izhar se dar lagta hai
itni rahon ki saubat se guzar jaane ke baad
ab kise vadi-e-pur-khar se dar lagta hai
kitne hi kaam adhure hain abhi duniya men
umr ki tezi-e-raftar se dar lagta hai
saari duniya men tabahi ke siva kya hoga
ab to har subh ke akhbar se dar lagta hai
khud ko manvaun zamane se to tukde ho jaun
kuchh rivayat ki divar se dar lagta hai
shauq-e-shorida ke hathon hue badnam bahut
ab to har jazba-e-bedar se dar lagta hai
janti huun ki chhupe rahte hain fitne is men
aap ki narmi-e-guftar se dar lagta hai
Leave a Reply