Sughra Sadaf
us ke chehre par ajab sa ruup tha achchha laga
us ki ḳhushbu-e-badan se rabta achchha laga
lams us ke haath ka phir hai rag-o-pai men ravan
chand lamhon ke milan ko sochna achchha laga
main ne phir dil se kaha us shaḳhs ki bai’at karo
vo jo har lamha mujhe achchha laga sachcha laga
apni tanha.i se kaisi ho ga.i manus main
aaj apna ḳhali ḳhali ghar baḌa achchha laga
us ne az-rah-e-takalluf mujh se puchha hal-e-dil
ye achanak hone vaala vaqi.a achchha laga
ye jahan yak-laḳht kitna ḳhubsurat ho gaya
tum bahut achchhi ho jab us ne kaha achchha laga
chup ki chadar taan kar ahl-e-qafas ke vaste
suliyon par bolne ka mashvara achchha laga
jis ghaḌi us ne mujhe dekha nazar bhar ke kabhi
mujh ko apna aap bhi us vaqt kya achchha laga
Darte Darte doston ki bazm men ‘sughra’ ‘sadaf’
ek duuje ko musalsal dekhna achchha laga
Leave a Reply