arman ko chhupane se musibat men hai jaan aur
sho.ale ko dabate hain to uThta hai dhuan aur
inkar kiye jaao isi taur se haan aur
honTon pe hai kuchh aur nigahon se ayaan aur
ḳhud tu ne baḌha.i hai ye tafriq-e-jahan aur
tu ek magar ruup yahan aur vahan aur
dil men koi ghuncha kabhi khilte nahin dekha
is baagh men kya aa ke bana legi ḳhizan aur
itna bhi mire ahd-e-vafa par na karo shak
haan haan main samajhta huun ki hai rasm-e-jahan aur
har lab pe tira naam hai ik main huun ki chup huun
duniya ki zaban aur hai ashiq ki zaban aur
ab koi sada meri sada par nahin deta
avaz-e-tarab aur thi avaz-e-fughan aur
kuchh duur pe milti hain haden arz-o-sama ki
sahra-e-talab men nahin manzil ka nishan aur
ik aah aur ik ashk pe hai qissa-e-dil ḳhatm
rakhti nahin alfaz-e-mohabbat ki zaban aur
vo sub.h ke taare ki jhapakne si lagi aankh
kuchh der zara dida-e-anjum-nigaran aur
‘mulla’ vahi tum aur vahi ku-e-hasinan
jaise kabhi duniya men na tha koi javan aur
Leave a Reply