un ke ik jan-nisar ham bhi hain
hain jahan sau hazar ham bhi hain
tum bhi bechain ham bhi hain bechain
tum bhi ho be-qarar ham bhi hain
ai falak kah to kya irada hai
aish ke ḳhvast-gar ham bhi hain
khinch la.ega jazb-e-dil un ko
hama tan intizar ham bhi hain
bazm-e-dushman men le chala hai dil
kaise be-iḳhtiyar ham bhi hain
shahr ḳhali kiye dukan kaisi
ek hi bada-ḳhvar ham bhi hain
sharm samjhe tire taghaful ko
vaah kya hoshiyar ham bhi hain
haath ham se milao ai muusa
ashiq-e-ru-e-yar ham bhi hain
ḳhvahish-e-bada-e-tuhur nahin
kaise parhez-gar ham bhi hain
tum agar apni guun ke ho ma.ashuq
apne matlab ke yaar ham bhi hain
jis ne chaha phansa liya ham ko
dilbaron ke shikar ham bhi hain
aa.i mai-ḳhane se ye kis ki sada
laao yaron ke yaar ham bhi hain
le hi to legi dil nigah tiri
har tarah hoshiyar ham bhi hain
idhar aa kar bhi fatiha paḌh lo
aaj zer-e-mazar ham bhi hain
ghair ka haal puchhiye ham se
us ke jalse ke yaar ham bhi hain
kaun sa dil hai jis men ‘dagh’ nahin
ishq men yadgar ham bhi hain
Leave a Reply