guzar ja rah-o-manzil se guzar ja mauj-o-sahil se
mohabbat ho to ye asaniyan milti hain mushkil se
muqabil ho gaya nadan un ke husn-e-kamil se
hamen ab tang aa kar haath uThana hi paḌa dil se
dil un ki raah men hai phir bhi gham jaata nahin dil se
mohabbat ka musafir be-ḳhabar hai apni manzil se
tum ahl-e-dil nahin ho phir vafa ka lutf kya jaano
vafa ki intiha dil par vafa ki ibtida dil se
abhi to shauq ki rahon men kho jaana bhi mumkin hai
ki ye rahen abhi mahfuz hain ilzam-e-manzil se
ḳhalish aur vo bhi gham ki dard aur vo bhi mohabbat ka
shikayat karne vaala tha dua nikli mire dil se
agar chahen to pahla hi qadam manzil pe ja pahunche
pareshan ho ga.e arbab-e-himmat qurb-e-manzil se
abhi tak zindagi men iztirab-e-ishq baaqi hai
abhi tak zindagi ki mauj ko nisbat hai sahil se
mujhe rah-e-talab ki azmaten uThne nahin detin
jo uThta huun to phir aage nikal jaata huun manzil se
mohabbat ke hazaron raste tai kar ke aa.e hain
tamannaon ki manzil tak tamannaon ki manzil se
Thahar ai mauj-e-shor-agin-o-shor-angez-o-shor-afza
abhi ik baat kahni hai mujhe yaran-e-sahil se
zahe ilzam-e-nazzara ḳhusha anjam-e-nazzara
nazar se be-ta.alluq dil nazar na-ashna dil se
mohabbat ne badal Daala nizam-e-zindagi ‘shahid’
na asani se dil taskin paata hai na mushkil se
Leave a Reply