Bhatka Hua Khayal Hai Uqba Kahen Jise

bhatka hua khayal hai uqba kahen jise

bhula hua sa khvab hai duniya kahen jise

dekhe shab-e-firaq men koi to ham dikhaen

dil ka vo daagh chand ka tukda kahen jise

zalim ki aarzu ne jagah li hai is tarah

dil men chhupa hua koi kanta kahen jise

in aarsi ke dekhne valon ko kya parakh

achchha hai vo hasin ham achchha kahen jise

gulzar men vo phuul hai jis ka hai naam mai

zahid vo sard baagh hai miina kahen jise

vaqif nahin vo roz-e-qayamat ke tuul se

vaada kiya hai vaada-e-farda kahen jise

hasil agar hui bhi to hasil nahin hai kuchh

be-e’tibar chiiz hai duniya kahen jise

itni to ho bayan men vaaiz shaguftagi

ham rind sun ke qulqul-e-mina kahen jise

ahl-e-haram men ja ke bina aaj shaikh-e-vaqt

kafir ‘riyaz’ pir-e-kalisa kahen jise

Leave a Comment