Kisi Ki Zulf Nahin Lab Ki Garmiyan Bhi Nahin

Abhay Kumar Bebak

kisi ki zulf nahin lab ki garmiyan bhi nahin

gulon pe aaj to avara titliyan bhi nahin

abhi ye haal hua is pe kashtiyan guzrin

vo gaanv jis pe kabhi chhain badliyan bhi nahin

hamara ghar hai ki divaron ki numaish hai

koi kivad to kya is men khidkiyan bhi nahin

garan thi shab to miri sub.h bhi hirasan hai

abhi ufuq pe vo pahle si surkhiyan bhi nahin

asir-e-jism hai jaan aur ye badan apna

kamal ka hai qafas jis men tiliyan bhi nahin

gai hai un pe bhi ab us ki barq-bar nazar

darakht jin pe hamare to ashiyan bhi nahin

suluk us ne mohabbat men vo kiya ‘bebak’

hua jo ham se adavat ke darmiyan bhi nahin