Lamhon Ki Parastar

Qateel Shifai

main ne chaha tha use ruuh ki rahat ke liye

aaj vo jaan ka azar bani baithi hai

meri aankhon ne jise phuul se nazuk samjha

ab vo chalti hui talvar bani baithi hai

ham-safar ban ke jise naaz tha hamrahi par

rahzanon ki vo taraf-dar bani baithi hai

kisi afsane ka kirdar bani baithi hai

us ki maasumiyat-e-dil pe bharosa tha mujhe

azm-e-sita ki qasam ismat-e-maryam ki qasam

yaad hain us ke vo hanste hue aansu mujh ko

khanda-e-gul ki qasam girya-e-shabnam ki qasam

us ne jo kuchh bhi kaha main ne vahi maan liya

hukm-e-havva ki qasam jazba-e-adam ki qasam

paak thi ruuh miri chashma-e-zamzam ki qasam

main ne chaha tha use dil men chhupa luun aise

jism men jaise lahu siip men jaise moti

umr bhar main na jhapakta kabhi apni anhken

mere zanun pe vo sar rakh ke hamesha soti

sham-e-yak-shab to samajhta hai use ek jahan

kaash ho jaati vo mere liye jivan-joti

dar-ba-dar us ki tamazat na pareshan hoti

main use le ke bahut duur nikal jaun magar

vo miri raah men divar bani baithi hai

zindagi bhar ki parastish use manzur nahin

vo to lamhon ki parastar bani baithi hai

main ne chaha tha use ruuh ki rahat ke liye

vo magar jaan ka azar bani baithi hai

kisi afsane ka kirdar bani baithi hai