Afzal Ahmad Syed
kabhi na khud ko bad-andesh-e-dasht-o-dar rakkha
utar ke chaah men patal ka safar rakkha
yahi bahut the mujhe naan o aab o shama o gul
safar-nazhad tha asbab mukhtasar rakkha
hava-e-sham-e-dil-azar ko asiir kiya
aur us ko dasht men pan-chakkiyon ke ghar rakkha
vo ek reg-gazida si nahr chalne lagi
jo main ne chuum ke paikan kaman par rakkha
vo aai aur vahin taqchon men phuul rakhe
jo main ne nazr ke patthar pe janvar rakkha
jabin ke zakhm pe misqal-e-khak rakkhi aur
ik alvida ka shugun us ke haath par rakkha
giraft tez rakkhi rakhsh-e-umr par main ne
bajae jumbish-e-mahmez-e-nishtar rakkha
Leave a Reply