Rafiq Sandelvi
use shauq-e-ghota-zani na tha vo kahan gaya
mire najm-e-ab mujhe bata vo kahan gaya
jo lakir paani pe naqsh thi vo kidhar ga.i
jo bana tha ḳhaak pe za.icha vo kahan gaya
kahan TuuTe meri tanab-e-jism ke hausle
jo laga tha ḳhema vajud ka vo kahan gaya
jo zamin paanv tale bichhi thi kidhar ga.i
vo jo asman saron pe tha vo kahan gaya
ga.e kis jihat ko tikon ḳhvab ke zaviye
jo ruka tha aankh men da.era vo kahan gaya
abhi aks us ka ubhar raha tha ki daf.atan
mire a.ine se bichhaḌ gaya vo kahan gaya
Leave a Reply