Abdullah Javed
jo guzarta hai guzar jaae ji
aaj vo kar len ki bhar jaae ji
aaj ki shab yahin jiina marna
jis ko jaana ho vo ghar jaae ji
is gali se nahin jaana ham ko
aan rukhsat ho ki sar jaae ji
vaqt ne kar diya jo karna tha
koi marta hai to mar jaae ji
shakh-e-gul mauj-e-hava raqsan hain
phuul bikhre to bikhar jaae ji
manzaron ke bhi pare hain manzar
aankh jo ho to nazar jaae ji
samt kya raah kya manzil kaisi
chal pado aap jidhar jaae ji
apni hi soch pe chalna chahe
apni hi soch se dar jaae ji
ye ajab baat hai aksar ‘javed’
jis se roken vahi kar jaae ji
Leave a Reply