ruuh meri alag hai jaan alag
zaat ka na-tavan makan alag
har taraf phailti hui kirnen
ik andhere ka ḳhandan alag
ek zarra huun aur kuchh bhi nahin
huun bahut kuchh hai ye guman alag
qaid hain aankh men ka.i sapne
aur hai fikr ki uḌaan alag
ik taraf shor ḳhana-e-dil men
aql rahti hai be-zaban alag
kar raha hai nasib ki baten
aur tadbir par hai maan alag
Dubte tairte hue qisse
aur hairat ki dastan alag
Leave a Reply