unhin logon ki badaulat ye hasin achchhe hain
chahne vaale in achchhon se kahin achchhe hain
kucha-e-yar se yarab na uThana ham ko
is bure haal men bhi ham to yahin achchhe hain
na koi daagh na dhabba na hararat na tapish
chand-suraj se bhi ye mah-jabin achchhe hain
koi achchha nazar aa jaa.e to ik baat bhi hai
yuun to parde men sabhi parda-nashin achchhe hain
tere ghar aa.en to iman ko kis par chhoḌen
ham to ka.abe hi men ai dushman-e-din achchhe hain
hain maze husn-o-mohabbat ke inhin ko hasil
asman valon se ye ahl-e-zamin achchhe hain
ek ham hain ki jahan jaa.en bure kahla.en
ek vo vo hain ki jahan jaa.en vahin achchhe hain
kucha-e-yar se mahshar men bulata hai ḳhuda
kah do ‘muztar’ ki na a.enge yahin achchhe hain
Leave a Reply