Poet
vo gham de rahe hain ḳhushi ho rahi hai
haqiqat men ab ashiqi ho rahi hai
abhi mohtasib mai-kade men na aa.en
Thahar ja.iye mai-kashi ho rahi hai
mohabbat men kitne hi mansur gum hain
ḳhudi bhi yahan be-ḳhudi ho rahi hai
na zauq-e-talab hai na ehsas-e-manzil
ye jiina hai ya ḳhud-kushi ho rahi hai
koi jur.aten dekhe ahl-e-havas ki
mohabbat se bhi dil lagi ho rahi hai
ye mai-ḳhane men kis ka paimana chhalka
bahut duur tak raushni ho rahi hai
na puchho yaganon ki begangi ko
ye sab dost men dosti ho rahi hai
ajab alam-e-‘kaif’ hai bazm-e-janan
nigahon se bhi bandagi ho rahi hai
Leave a Reply