jazire ki tarah meri nishani kis liye hai
mire charon taraf paani hi paani kis liye hai
main aksar sochta huun dil ki gahra.i men ja kar
zamin par ek chadar asmani kis liye hai
ba-zahir pur-sukun aur dil ki har ik rag salamat
to zer-e-sat.h-e-dariya ik ravani kis liye hai
main TuuTa huun to apni kirchiyan bhi joḌ lunga
pa chehre par mire ye shadmani kis liye hai
ye dil be-hausla dil mere kahne men nahin jab
to apne dil ki main ne baat maani kis liye hai
karen lahje badal kar guftugu ik dusre se
hamare darmiyan ye be-zabani kis liye hai
sabhi kirdar apna kaam puura kar chuke hain
to aḳhir na-mukammal ye kahani kis liye hai
Leave a Reply