ik adhuri si kahani main sunata kaise
yaad aata bhi nahin ḳhvab vo bikhra kaise
kitne sayon se bhari hai ye haveli dil ki
aisi bhagdaḌ men koi shaḳhs Thaharta kaise
phuul zaḳhmon ke yahan aur bhi chun luun lekin
apna daman main karun aur kushada kaise
dukh ke sailab men Duuba tha vo ḳhud hi itna
meri ankho tumhen deta vo dilasa kaise
kanch ke zaar se bas dekhta rahta tha tumhen
band shishon se main avaz lagata kaise
is ka phan main ne bahut der talak kuchla tha
rah gaya saanp tire dard ka zinda kaise
ab to ankhon men siyahi si bhari rahti hai
aise aalam men koi ḳhvab ho ujla kaise
daagh hi daagh ubhar aa.e mire chehre par
rang mera ai musavvir hua bhadda kaise
ḳhushk miTTi men paḌa tha mire dil ka paudha
is ki shaḳhon pe koi phuul bhi aata kaise
Leave a Reply